Алтынньы 16 күнүгэр Таатта улууһун Тыараһа нэһилиэгэр дьаһалта уонна общественность көҕүлээһининэн саха бастакы оҕо суруйааччыта Вера Дмитриевна Давыдова төрөөбүтэ 125, ССРС суруйааччыларын сойууһун чилиэнэ, Аҕа дойду Улуу сэриитин кыттыылааҕа Иннокентий Илларионович Эртюков төрөөбүтэ 110 сылларыгар, ону сэргэ «Чолбон» сурунаал төрүттэммитэ 100 сылыгар анаммыт тэрээһин буолан ааста.
Тэрээһин Вера Давыдова дьоно олорбут, сүүстэн тахса саастаах, билигин коррекционнай оскуола куукуната буолан турар дьиэҕэ мемориальнай дуосканы арыйыыттан саҕаланна. Манна дьиэ эркинигэр «Афанасий уонна Дмитрий Давыдовтар дьиэлэрэ» диэн суруктаах дуосканы ииллилэр.
Ол кэннэ үөрүүлээх быһыыга-майгыга буолбут кэпсэтиигэ «Чолбон» сурунаал бас эрэдээктэрэ Гаврил Андросов Тыараһа нэһилиэгин дьоно сахалыы бэчээт сайдыытыгар кыттыыларын туһунан иһитиннэрии оҥордо. Кини 1906 сыллаахха тахсыбыт сахалыы бастакы сыһыарыыларга эрэдээктэринэн үлэлэспит Елпидифор Егасов, Вера Давыдова, «Чолбон» сурунаалга аан бастакы тылбаас айымньытын бэчээттэппит Александр Игнатьев уонна «Хотугу сулус» сурунаалга үлэлээн ааспыт Иннокентий Эртюков тустарынан бэлиэтээтэ. Тыараһа нэһилиэгин күтүөтэ, саха биллэр суруйааччыта Иван Егорович Федосеев—Доосо «Хотугу сулус» сурунаал эппиэттиир сэкирэтээринэн үлэлии олорон сурунаал историческай даататын чуолкайдааһыҥҥа үлэтин-хамнаһын, кини сурунаалга хаалларбыт үтүөтүн кэпсээтэ. Кэлиҥҥи сылларга Тыараһаттан поэт Ирина Колодезникова—Ымыы «Чолбон» сурунаалга хара өлүөр диэри бэчээттэммитин эттэ, Тыараһа нэһилиэгин уонна «Чолбон» сурунаал ситимнэрин туһунан сырдатта.
Нэһилиэк баһылыгын солбуйааччы Туналы Солко: «Бу кэпсэтии түмүгүнэн нэһилиэк общественноһа сахалартан бастакы оҕо суруйааччыта Вера Дмитриевна Давыдова аатын нэһилиэк уулуссатыгар уонна библиотекаҕа иҥэрэргэ диэн сүбэлэстэ. Тыараһалар «Чолбон» сурунаалы сэргээн, кэрэхсээн ааҕалларын уонна салгыы суруттаран ааҕыахпыт диэн баҕа санааларын эттилэр».
Бу дьоһун кэпсэтиигэ улуустааҕы киин библиотека дириэктэрэ Анна Билюкина, улуустааҕы норуот айымньытын дьиэтин дириэктэрин солбуйааччы Иван Беляев, үөрэҕирии управлениетын отделын салайааччыта Мира Луковцева, Чөркөөхтөөҕү политика сыылкатын музейын үлэһиттэрэ Изабелла Жерготова, Сардаана Аввакумова, нэһилиэк общественноһа, учууталлар, оскуола оҕолоро, кыраайы үөрэтээччилэр, аҕа саастаахтар уонна нэһилиэк салайааччылара кытыннылар.
Сайыына Черкашина
