— Ити туһунан кимиэхэ да кэпсээмэ, — төлөпүөннэһэн бүтэрбитигэр апаа* көрдөһө хаалла. Кэпсэтэн бүттүбүт. Кини кэрэ куолаһын истэн сүргэм олус да көтөҕүлүннэ! Мин хоспор сүүрэн испит санаабар, үөрүүбүттэн ити таас хайаларга көҥүл мэччийэ көрүлүүр чубуку оҕотун курдук көтө-дайа истим быһыылаах! Дьон туораттан көрдөҕүнэ, уол төбөтүнэн бырахтараары гыммыт да дии санаатахтарына көҥүл. Миигин оннук санаа билигин кыл да түгэнэ долгуппат, саараама. Туох да диэтиннэр!
Мин туох айылаах буолан, сири билбэт буолуохпар диэри үөрбүппүн ким да билбэт. Ылы-чып кистэлэҥ! Ону кимиэхэ эмэ арыйа баттаан кэпсиир – букатын сатаммат! Ким да буоллун!
Орто Туруу бараан дойдуга Дьол диэн ааттанар күүтүүлээх күндү түгэн тосхойоро диэн баар эбээт! Кини хантан да кэлбитэ биллибэккэ, үөйбэтэх өттүгүттэн да диэххэ сөп, биирдэ баар буола түһэр. Нохтолоох тойон сүрэххин, маанылаах хара быаргын, өйгүн-санааҕын бүттүүн биирдэ баһыйан толорор күүстээх! Бу түгэн тиийэн кэлэрин күүтэргэ-манаһарга, оо, сорох ардыгар төһөлөөх күн-дьыл ааһарый! Кэтэһэртэн ордук киһини тууйар-хаайар бу орто дойдуга туох да суох да курдук.
«Дьолбут тосхойдун! Уҥа өттүбүтүттэн өтөн киирдин, хаҥас өттүбүтүттэн кутуллан кэллин, күүтүллүбэтэх өттүбүтүттэн эмиэ тосхойдун!» – диэн биһиги ийэбит барахсан дөрүн-дөрүн ботугуруур буолара. Кэтэстэххэ – бириэмэ уһуур дииллэр. Сорунан-болдьоон туран, дьэ, кэлбэт да кэлбэт. Бүтэр тиһэҕэр санааҥ аттар-атан, эрэл кыыма уостубунан барар. Дьэ субу түгэҥҥэ, күүппэтэх-көһүппэтэх өттүгүттэн – биирдэ баар буола түһэр! Дьол диэн, хор, оннук.
Мин да дьол диэн тугун билэр түгэним үүннэҕэ! Көрөөрүҥ, истээриҥ да, аҕыйах хонугунан мин дьылҕам тэһиинин үтүө суолга салайыам!
…хоспор кинигэ ааҕа сыттахпына эмискэ баахтаттан илдьит кэллэ: «Эйигин төлөпүөҥҥэ ыҥыраллар».
Оо! Таҥара баар эбит! Мин кутум билигин үрдүк мэҥэ халлааҥҥа. Миигин бу тухары биирдэ да төлөпүөҥҥэ ыҥырбыттара, ким эмэ көрдөөн ыйыттарбыта диэн суоҕа. Хаһан баахтаҕа түһүөхпэр диэри тыһыынчанан санаа хаайа тутта: ким буолуон сөбүй… ким?
– Ильяс, дорообо доҕоор! Биллиҥ дуу? – төлөпүөн анараа уһугар бэркэ таптыыр саҥам иһилиннэ. Мин маҥнай билбэккэ мух-мах барыахча буоллум, ким саҥарарын төрүт да таайбатым, онтон: – Хайа, хайдаххыный? Этэҥҥэ инигин? Доруобуйаҥ үчүгэй да?..
Ити ыйытыы кэннэ хараҕым сырдаабычча буолла. Хайа! Бу Найля-апаа дии! Сайыҥҥы лааҕырбыт медсиэстэрэтэ! Кинилиин сайын билсэн турабыт ээ. Быйыл биһигини бэрт ыраах сиргэ сайылата ыыппыттара. Лааҕыр кэмигэр тоҕо эрэ биир кэм ыалдьан тахсыбытым. Ол сир салгынын атыҥыраан дуу, дойдубун олус ахтан дуу… Этим дэлби итийэр буолан медпуунтан тахсыбат да курдук сылдьыбытым. Онно баар сиэстэрэ күн аайы көрөр-истэр, эмтиир, эмпин биэрэр, сүбэ-ама буолар этэ. Найля-апаа олус кыһамньылаах. Биэс уонча саастаах, сайаҕас, үөрүнньэҥ киһи. Лааҕыр кэмигэр кинилиин олус истиҥ доҕордуу кэриэтэ буолбуппут. Кини ас арааһын, минньигэһин аҕалан куруук амсатар этэ.
Биирдэ кини тугу эрэ саныы олорон: «Биһиги кэргэмминээн иккиэбит эрэ, оҕобут суох. Эйигин бэйэбитигэр ыларбыт дуу…»
– Мин сөбүлэһэбин! – ырааҕы-киэҥи саныы барбакка этэн кэбиспиппин кулгааҕым эрэ истэн хаалла…
Лааҕыр бүтэн, детдомҥа барар кэм тирээн кэлбитэ. Найля-апааны кытта арахсар наһаа да ыарахан этэ. Кини: «Ильяс! Мин эйиэхэ тиийэ сылдьыам!» – диэт, уоскутаары кууһан ылбыта.
Сайын, куруук буоларын курдук, бэрт түргэнник ааһан хаалбыта, үөрэх кэмэ саҕаламмыта. Мин бу күҥҥэ диэри сиэстэрэ Найля-апааны төһөлөөх элбэхтэ санаабытым буолуой? Оттон бүгүн ол санаам туолан, күүтүүлээх төлөпүөнүнэн кэпсэтэр түгэн тосхойдо!
Кини мин кэлиҥҥи ситиһиилэрбин, олохпун-дьаһахпын, күһүҥҥү каникулбар ханна бараары сылдьарбыт туоһуласпыта… Ханна бараахтыахпыный, детдоммар олороохтуур буоллаҕым.
– Ильяс, мин эйиэхэ мээнэҕэ эрийбэтим. Эйигин бэйэбитигэр ыларга быһаарынныбыт. Кэргэним сөбүлэһэр.
Найля-апаа ити тылын истэн баран кынаттаммыт курдук буола түстүм. Миигин?! Миигин мантан ылаллар үһү! Тыый, түһээн да санаабат санаам! Үчүгэйиин!
– Каникул кэмигэр дуо? – бэйэм үөрүүбүн кыатана сатыы-сатыы ыйытабын.
– Суох, букатыннаахтык. Опекалары кытта кэпсэппитим, докумуоннары хомуйан туттарыам. Эн туох диигин ону?
– Сөбүлэһэбин! Мин сөбүлэһэн бөҕө буоллаҕа дии! Сө-бү-лэ-һэ-бин! – мин кыана-туттуна сатаабыт үөрүүм уххана төлө биэрэн, баҕар ситэ истиэ суоҕа диэбитим дуу, төлөпүөҥҥэ туох баар куоласпынан хас да төгүл хаһыытаатым. Үөрүүбүттэн, бэл көлөһүн аллан, сүүһүм уунан бүрүлүннэ. Тоҕо бэрдэй ис-искиттэн үөрэр диэн, тоҕо бэрдэй үөрүүнэн туолар диэн! Бу үөрүү кыната чахчы миигин булла дуо? Биитэр, баҕар, түһүү сытарым буолаарай?
– Оннук буоллаҕына миигин кэлэр нэдиэлэҕэ күүтээр, – диэтэ Найля-апаа. – Ол да буоллар ити туһунан кимиэхэ да этимэ…
Бу дьол буолбакка, тугуй? Дьол буолбатаҕына атыннык туох дэнэрий? Мин испиттэн туох төлө көтө тахсыан баҕарарый? Найля-апаа кимиэхэ да кэпсээмэ диэтэ. Ону хайдах испэр тууйан сылдьабын? Билбит дьолбун, истиҥ үөрүүбүн дьоннуун үллэстибэккэ? Ыарахан сорук. Үөрүүҥ эн искиттэн тахса охсуон, дьон-киһи кулгааҕар тиийэ охсуон, салгыы тарҕаныан баҕарар эбээт! Детдомҥа барытыгар кэпсээбит киһи баар ини ньии! Билэн үөрдүннэр, истэн ымсыырдыннар! Көрдүннэр ээ, аан дойдуга үтүө санаа диэн баарын! Үөхсэллэригэр бэртэр дии, кур балык диэн ааттыыллар, күлүү гыналлар… Оттон Найля-апаа миигин эрэ талбыта, атыттары көрө да сорумматаҕа. Дьол диэн бу буолар!
Эмискэ кэлэн түспүт соһуччу дьолбун хайдах гынары толкуйдуурга бэрт өр кэм эрэйдэммитим, ол эрээри бэйэбин куруук туттунар этим. Найля-апаа туох диэбитин толоруохтаахпын.
Биир киэһэ, бары телевизор иннигэр мустан олордохторуна, алҕас тыл быктаран, этэн кэбиһэ сыспытым.
– Биири этэбин дуо… – саҕалаан баран, өйдөөн, ах баран хааллым. Аны этэн кэбиһиэм диэн, бэл икки илиибинэн айахпын саба тутуннум.
Ол түүн сатаан утуйбатаҕым. Найля-апаа тылын саныы, онтон долгуйа сыппытым. Араас санаа үүйэ тутар. Маннык кэмҥэ уум кэлиэ дуо?
Бука диэн, Найля-апаа киэҥ квартиралаах буолуохтаах… Онно арай туспа хос биэрдиннэр, олох астык! Ол эрээри саамай үчүгэйэ – көҥүл! Хаһан, тугу таптыыргынан аһыыгын! Саҥа таҥас ылан биэрэллэрэ буолуо өссө.
Велосипед! Найля-апаа миэхэ хайаан да велосипед ылан биэриэҕэ! Өр да буолла, велосипедка олорор диэн тугун билбэтэҕим! Биһиги уолаттарбыт араас эргэ-урба малтан самокат оҥорбуттара да, ону кыратык сүүрдэ түһэргэ халыҥ уочарат. Өссө эбиитин хайаан да тугунан эмэ төлүүгүн: дьаабылыка дуу, кэмпиэт дуу.
Дьиэ кэргэннээх буоллахпына, арааһа, халыҥ наскы баайан биэриэхтэрэ. Оннуга суох кыһыны туоруур ыччака соҕус ини? Биһиги түүҥҥү ньээҥкэбит биһиэхэ барыбытыгар наскы баайар. Үлэтигэр кэллэ эрэ баайбытынан барар. Биһиги көмөлөһөбүт: сап буолуохтаах түүнү таҥастыыбыт, субуйабыт, биир тэҥ сап оҥоробут. Ол эрээри биһиги сүүрбэбит, кини соҕотох. Наар баайа олорбот буоллаҕа, атын бэйэтин үлэтэ хара баһаам. Сырыы аайы биир-икки чаас баайар. Онон, биир ыйга үс да киһиэхэ баайан бүтэрдэҕинэ, барыбытыгар тиийэр гына төһөлөөх өр күүтүөххэ нааданый? Хайыахпытый, уочараппыт кэлэрин олус күүтэбит, тоҕо диэтэргин биһиэхэ бэриллэр наскынан кыһын ырааппатыҥ биллэр буоллаҕа. Онуоха эбии улахан тымныыларга уллуҥаҕа тостурута барар бачыыҥка дуома.
Мин биирдэ оннук үтүө наскыга тиксэн турардаахпын! Мин уочаратым муус устар ыйыгар кэлбитэ. Бу кэмҥэ номнуо сылыйан, наскыбын кэппэккэ эрэ, аны күһүҥҥэ диэри ууран кэбиспитим. Күһүн ылааччылар киэннэрэ кыһыны быһа кэтиллэн, сааһыары тэстэн, кэлэр кыһыҥҥа эргэ наскыны кэтэр буоллахтара. Оттон миэнэ саҥатынан сылдьыаҕа! Сайын туумбабар анньан кэбиһэн баран, арай күһүн кэлэн көрбүтүм – пахай, моль бүтүннүү сиэн, киһи кэппэт гына дьаабылаабыт этэ. Наскыланан бүттэхпит ол.
Найля-апааҕа оннук буолбата чахчы. Мин өссө халыҥ баайыы наскыны кэтиэм! Итинник саныы сытан, өйүм-санаам ыралаах долгунугар уйдаран, утуйан хаалбыппын.
…Нөҥүө күнүгэр тулуйарбыттан ааһан, кэпсиэх санаам субу-субу ыган кэлэр буолара үксээн барда. Ол гына сылдьан, бииргэ үөрэнэр дьоммуттан бастакынан Амиляҕа кэпсээтим. Оттон Амиля тугу эмэ билбит буоллаҕына… Быһата, араадьыйа да наадата суох курдук. Бука бары аахтарбытынан ити туһунан билэр буола түстүлэр. Бу да сырыыга оннук буолла. Маҥнай утаа бэйэм да кэтээн көрөрбөр интэриэһинэй курдук этэ: бары кэлэн туоһулаһаллар, буолаары буолан хайаан да киниэхэ эрэ ким да билбэтин, истэ илигин… Сорох ордугургаан турбута да биллэр буоллаҕа. Хара сарсыардаттан утуйар кэмҥэ диэри детдом сонуна, кэпсээнэ биир эрэ – Ильяһы иитэ ылаллар үһү… Детдому ааһан, аны бу сонун оскуоланы биир гына тилийэ көттө. Арай балтым Алия эрэ хара маҥнайгыттан итэҕэйбэтэҕэ, итэҕэйиэн да баҕарбатаҕа.
– Сымыйалыырыҥ буолуо, дьон күлүүтүгэр бараары, – диэт, кэлэйбиттии сапсыйан кэбиспитэ.
Хас да күн ити курдук болҕомто киинигэр, дьон хараҕын ортотугар сырыттым. Онтон кистэлэҥмин арыйбыппын кэмсинэн барбытым. Онуоха эмиэ кытаанах төрүөт баара… Киэһэ арай хоспор киирбитим – уолаттар бары кэриэтэ мустубуттар эбит. Туохха кэлбиттэрэ, тоҕуоруспуттара биллэр буоллаҕа.
– Хаһан кэлиэхтээхтэрий? Ханнык күҥҥэ? – Динар кэпсэтэн саҕалаата.
– Билбэтим ээ. Каникул иннигэр быһыылаах…
Уолаттар сирэйдэрин-харахтарын олоруута тыйыс соҕус этэ. Ордук санааһын бу дьиэҕэ маннык түгэҥҥэ оҕолуу ымсыыттан арыый атын, хаҕыс соҕус буолара. Мин үөрүүм санаам муҥутуур түгэҕэр кирийбитэ, тоҕо диэтэр манна киирбит хас биирдии уол ол үөрүүнү суох гынар баҕата хараҕар сурулла сылдьар этэ.
– Дыа, кэлбит дьон хайаан да эйигин ылыахтара диэн эн хантан билэҕин? – кэпсэтиигэ Дим кыттыһар. – Тохтоо торбос! Манна оҕо элбэх ээ. Ол апаа баҕар манна баар оҕолору көрөн баран эйиэхэ олох да чугаһыа суоҕа дии. Оччоҕо?
– Дии, ноо! – тулуйарын ааспыт Нил улахан саҥата иһийэн турбут хос иһин толорон кэбиһэр. – Эн наар ыалдьан тахсаҕын дии. Физкультураҕа да наар үһүнэн үөрэнэҕин дии, мин буоллар биэһинэн. Санаан көр ээ, киниэхэ баҕар спортсмен наада буолуо дии? А? Оннук диэтин арай? Дьэ оччоҕо бырастыы гынаргар тиийэҕин.
– Мин Найля-апааны уруккуттан билэбин! Кини миэхэ бэйэтэ эппитэ, эйигин кэлэн ылыам диэн! Тугуй, мин бэйэм көрдөһөн туран баран эрэр үһүбүн дуо?! – көмүскэнээри тыл ыһыктабын да, уолаттар ону истэн өссө сэтэрэн тураллар:
– Кэллин-кэллин, биһиги да баарбыт.
– Оттон мин арай ыллаан барыым…
Накаас эбит! Тоҕо кэпсээбитим буолла? Ийэм да этэрин өйдөөбөтөхпүн: «Эһиги кистэлэҥҥитин кимиэхэ да кэпсиэ суохтааххыт. Доҕотторгутугар эмиэ. Доҕотторгут эмиэ атын доҕоттордоох буоллахтара. Сатаан тулуйбат буоллаххытына, платок ылан баран, туох бааргытын барытын онно кэпсиигит уонна хам баайан кэбиһэҕит. Бүттэҕэ ол, эйигиттэн уонна хам баайыллыбыт платоктан ураты эн кистэлэҥҥин ким да билбэт».
Уолаттар бу мин дьолбуттан бэрсиһиннэрэ сатыыр дьүһүннэрэ буоллаҕа. Ону миигиттэн кистээбэттэр даҕаны. Соруйан, собус-соруйан кыйахыыллар, өссө апаа кэллэҕинэ тугу гыналларын кэпсииллэр. Бу да «ыллыам» диир, наар кэлэҕэйдээн тахсар Рустам дии. «Мамонтенок ырыатын» ыллыам диир. Наар итини ыллыыр. Хайалара үөрэппит сордоох ырыата буоллаҕай? Ханнык эмэ оройуоннааҕы көрүү буолла да – дириэктэр Рустамы хайаан да ыллыырга күһэйэр. Тыллара да бааллар дии:
Пусть мама услышит,
Пусть мама придёт,
Пусть мама меня непременно найдёт!
Ведь так не бывает на свете,
Чтоб были потеряны дети…
Аһыннараары… Бу строкалар кэллилэр да, дьэ, хараҕын да уута кэлэрэ бэрт, тохтоло суох маккыратар. Ол көрүүгэ эмиэ инньэ гыммыта. Дьүүллүүр сүбэҕэ баар дьахталлар, биллэн турар, харахтарын ууларын туттунуохтара дуо, көрөөччү ытыс тыаһын харыһыйыа дуо? Бастакы миэстэ – Рустам. Детдомҥа улахан тойоттор кэллилэр эрэ эмиэ, Мавлида Нургалиевна «Мамонтеногы» ыллатар. Аһыналлара биллэр буоллаҕа дии. Дьэ ол кэмҥэ дириэктэр субу баар буола түһэр: көмөнү хайа талбытынан оҥотторор.
– Сыанаҕа туран ытыах санаам кэлбэтэҕинэ – тылбын быһа ытырааччыбын, – биирдэ Рустам киһиргиир кэриэтэ билиммитэ. Ол харах уутун аайы дириэктэртэн саҥа таҥас. Сатабыллаах уол диэтэҕиҥ! Оттон Найля-апаа иннигэр маннык ыллаан ыыра бардын – дьыалабыт хаахтыйар ээ! Дим туора туран хаалыан эмиэ баҕарбат:
– Оттон мин ити апаа биһиэхэ киирдэҕинэ муостаны сууйбутунан барыам. Үлэһит да оҕо эбит диэҕэ! Оннук уол оҕо ыал аайы баҕалаах. Оннук буолан хааллаҕына хомойо-хоргута сылдьаайаҕын!
Күүтүүлээх Найля-апаа дьэ тиийэн кэллэ. Оо, оҕолор кинини хайдах курдук көрсүбүттэрин, кинилэр харахтарын уотун көрүө этигит… Мүөтү булбут ыҥырыалар курдук, тула өттүттэн күөйэ сырыттылар. Оннук киһи хардыы да оҥорор кыаҕа суох буола түспүтэ. Киниэхэ анаан детдом устун экскурсия оҥордулар. Оҕолор хаалсыбакка тэҥҥэ батыһа сырыттылар. Харахтарын уота биир эрэ соруктаах умайар: хайдах эмэ гынан миэхэ болҕомто уурдар ханнык диэн. Найля-апаа буоллар кэллэ кэлээт миигин илиибиттэн сиэппитэ уонна ити тухары ыыппатаҕа.
Детдом хайдах, тугунан тыынан олорорун билсиһиннэрэн баран дириэктэр миигин уонна Найля-апааны бэйэтин хоһугар киллэрдэ.
– Таҥара баар эбит диэн маны этэн эрдэхтэрэ… Оҕо ылыахпын баҕарбытым ыраатта даҕаны этэ. Итэҕэйбэт да курдукпун… – апаа мин көхсүбүн имэрийбэхтиир. – Билигин каникулга ылыам. Ол кэмҥэ докумуоннарбын бэлэмниэм.
Ол кэннэ миигин хоспор ыыттылар. Малым былыр үйэҕэ хомуллан турара – биллэр дьыала буоллаҕа. Ону ыла охсоору тэбинним. Соммун сиирэ-халты анньынаат, суумкабын санныбар быраҕынным. Саалаҕа киирдим. Арай онно балтыларым Алия уонна Зульфира олороллор эбит. Хайа эмэ үйэттэн хомойбут, ытаан-ытаан харахтара иһэн хаалбыт сирэйдэрин көрөн, ах баран хааллым.
– Ильяс-агаа*, эн биһигини быраҕан баран эрэҕин дуо? Ити кырдьык дуо? – ытыырын быыһыгар Зульфира бэрт нэһиилэ саҥа таһааран ыйытта.
Туох диэхпиний, тугу да этиэхпин булбакка таалан турдум. Биир да тыл суох. Бэйэлээх бэйэм хаан-уруу балтыларбын хайдах умнан кэбиспиппиний ити? Наһаа да ыарахан этэ ити түгэҥҥэ…
– Кини умнубут! Аҕабыт өлүөн иннинэ эппит кэриэһин умнубут! – Алия атын сир диэки көрөн туран чахчы абарбыт-хомойбут саҥатын таһаарда. Харахпын утары көрбөккө эппитэ миэхэ өссө ыарыылаах этэ. Аҕабыт эппитэ: «Куруук бииргэ сылдьыҥ, бэйэ-бэйэҕитин көрө сылдьаарыҥ!» Эн буоллаҕына… – балтым барахсан сирэйин икки ытыһынан саба туттан баран уйа-хайа суох ытаан барда.
– Мин оччоҕуна убайа суох хаалабын дуо? Тэһийбэтэхпинэ оччоҕо аны хайдах буолабыт?
Ити тыллар сыппах быһахтыы сүрэҕим ортотунан, ханнык да тыл, ханнык да санаа сатаан хамсаабатын курдук аалыллан киирбиккэ дылы буоллулар. Туох диэн хардарыахпыный?
– Таҥнарыахсыт! Эйигин, тугуй, сыгааннар ииппиттэрэ дуо? Ийэлээх-аҕабыт билигин бааллара буоллар туох эрэ диир этилэр!
Манныгы этэн эрдэхтэрэ – барар сир баҕана үүтэ, кэлэр сир кэлии үүтэ диэн. Биирдэ өйдөөбүтүм, хараҕым уута тохтоло суох иэдэһим устун сүүрбүт эбит. Сибилигин аҕай көтүөххэ кыната суох сылдьыбыт бэйэм субу буолан турабын… Аан дойдуга баар саамай чугас дьоммун умнубуппун.
– Ильяс, кытаат, дириэктэр күүтэр, – иитээччим тиэтэтэ сатыыр да, онно аны хайдах да сатаан барыа суохпун.
Чахчы сыыспыппын. Алия сөпкө этэр, мин таҥнарыахсыппын! Куолайбар туой буор хам сыстыбыт курдук. Саҥа тахсыа дуо, сатаан өрө тыынар да кыах суох! Илиим-атаҕым истибэт. Хараҕым уута биир кэм тохтоло суох сүүрэр… Найля-апаа баар хоһугар хайдах илдьибиттэрин өйдөөбөппүн, хайдах эрэ тиийбиппин быһыылаах. Киниэхэ да барыах санаа хаайар, балтыларбын да быраҕар табыллыбат.
Дириэктэр хоһугар киирээппин кытта Найля-апаа тута туох эрэ соччото суох быһыы тахсыбытын сэрэйбитэ.
– Хайдах буоллуҥ? – ыйыта тоһуйда.
– Суох, – кыатана сатыы-сатыы тыл ыган таһаардым. – Найля-апаа, эн… миигин бырастыы гын…
Титирэстээн бардым, биир да тыл салгыы сатаан тахсыбата.
– Мин эһиэхэ сатаан барбаппын. Манна хаалабын.
Дириэктэр уонна сиэстэрэ улаханнык да соһуйбуттара! Кинилэр ыйытыынан туолбут харахтарын утары көрөр кыра да кыах суоҕа… Мин бэрт түргэнник кабинеттан тахса охсон, биирдэ таһырдьа баар буола түстүм. Уулуссаҕа тахсаат да, киэр сүүрдүм… өөр да өр сүүрдүм… ханнатын билбэккэ харса суох ыраата сүүрдүм…
Устар уһун күнү быһа ойуур устун хаамтым… Киэһэ төннөн кэлиибэр Найля-апаа суоҕа…
Айгиз Баймухаметов
Нууччалыыттан Рустам Каженкин тылбааһа
«Чолбон». – 2019. — №3
