От ыйын 29 күнүгэр «Чолбон» сурунаал уонна СӨ уус-уран ойуулуур-дьүһүннүүр музейа «Colbon хомуһуна» саха поэзиятын түһүлгэтин тэрийэн ыыттылар. Көрсүһүү «Colbon ойуута» быыстапка эскурсиятыттан саҕаланна. Ыалдьыттар экспозиция уус-уран тосхолун уонна кини сүрүн дьүһүлгэннэрин кытары билистилэр.
Салгыы түһүлгэ ыалдьыттара – үс ураты суоллаах-иистээх поэттар Гаврил Андросов-Хабырыыс Ондороос, Рустам Каженкин, Гавриил Адамов бэйэлэрин араас кэмнээҕи хоһооннорун уус-ураннык аахтылар. Ис сүрэхтэн эмиэ да намыыннык, сороҕо дирбиэннээхтик ааҕыллыбыт эпостыы, лирикэлии уонна гражданскай поэзия истээччи кутун тутта. Хоһооннору ааҕыы кэннэ поэттар сүгүрүйээччилэрин кытары атах тэпсэн олорон аһаҕастык кэпсэттилэр.
Гаврил Андросов, «Чолбон сурунаал бас эрэдээктэрэ:
– Редактор быһыытынан элбэх хоһоону көрөбүн, наардыыбын, сыыйабын. Сорох дьон «барыта сөп, мин көрүүм маннык» диэх курдук этэллэр. Ол сыыһа. Хайа баҕарар айымньы чочуллуохтаах, киһи бэйэтин алҕастарын көрө, өйдүү үөрэниэхтээх. Оччоҕо эрэ сайдаҕын. «Чолбон» сурунаал айар-суруйар дьону кытта ыкса үлэлиибит. Быйыл Покровскай куоракка ыытыллыбыт литература түмсүүлэрин форумугар, Уус Алдаҥҥа сурунаал күннэригэр дьон айымньыларын сирэй көрөн олорон ырыппыппыт. Ону кыттааччылар олус астыммыттара. «Чолбон айар кыһата» бырайыакпыт чэрчитинэн икки төгүл аччыгый прозаҕа мастарыскыай тэрийдибит. Инникитин поэзияҕа тэрийэр санаалаахпыт.
Рустам Каженкин, П.А. Ойуунускай аатынан литература музейын дириэктэрэ:
– Оскуолаҕа сылдьан өйтөн суруйууну сүрэҕэлдьээн хоһоон форматынан суруйар этим. Миэхэ оннук судургу этэ, түргэнник тахсара. Ырыа буолбут хоһооннордоохпун. Матыыптарын үксүн биир дойдулааҕым Иннокентий Васильев-Лэгэнтэй суруйбута. Хоһоон ырыа буолара диэн сүрдээх дьикти, эн айымньыҥ буолан бүтэр курдук. Ким матыып суруйарыттан, ким ыллыырыттан тутулуктаах. Холобур, «Эн миигин умнумаар, Сэргэлээх» диэн санаабар олус намыын ырыаны Happy Chuck рок-бөлөх түргэн тэтимнээхтик ыллыыра эмиэ олус дьиктитик иһиллэр. Уопсайынан, хоһоон буолбут ырыа эн дьиэҕиттэн тахсан бэйэтэ дьиэ-уот тэриммит оҕоҥ курдук буолар.
Гавриил Адамов, М.К. Аммосов аатынан ХИФУ устудьуона:
– Бастакы хоһооммун оскуолаҕа экзамен туттараары сылдьан дьонум утуй диэбиттэрин истибэккэ хоспор хатанан олорон кистээн суруйан кэбиспитим. Ол долгуйууттан тахсыбыта быһыылааҕа. Хоһоон иэйииттэн кэлэр – үөрдэхпинэ, хомойдохпуна, санаабын кимиэхэ эмэ тиэрдиэхпин баҕардахпына. Иван Арбитаны, Альберт Бүлүүйүскэйи, Варвара Потапованы сэҥээрэн ааҕабын. Бэйэбин гражданскай лирикаҕа суруйабын дэнэбин. Ааҕааччыны кытары көрсүһүүлэртэн дуоһуйууну ылабын, хоһоон ааҕарбын олус сөбүлүүбүн уонна истээччи хайдах ылынарын кэтээн көрөбүн.
«Чолбон ойуута» быыстапка чэрчитинэн ааҕааччылары кытары көрсүһүү аны драмаҕа ананара былааннанар. Санатар буоллахха, бу иннинэ ыытыллыбыт тэрээһиҥҥэ прозаиктар Анна Варламова-Айысхаана, Данил Макеев кыттыбыттара. Быыстапка балаҕан ыйын 6 күнүгэр диэри туруоҕа. Маннык түмсүүлэри үөрэх кыһаларын, тэрилтэлэри кытары тэрийиэххэ сөп.
Анна Прудецкая
Владимир Григорьев хаартыскалара
