Сурунаал партнердарын ахсаана сылтан сыл ахсын хаҥаан иһэр. Кинилэр көмөлөрүнэн үлэ хайысхалара кэҥииллэр, суруйар-айар дьону көҕүлүүргэ күүс-көмө эбиллэр.
2023 сыллаахха Саха Республикатын культуратын үтүөлээх үлэһитэ, Россия суруналыыстарын сойууһун чилиэнэ, документалист-суруйааччы Дмитрий Николаевич Гаврильев төрөөбүтэ 85 сыла буолбута.
Быйыл кини аатынан «Чолбон» сурунаал кыраайы үөрэтиигэ бириэмийэтин аан бастаан туттардыбыт. Партнердарбыт – Дмитрий Николаевич Гаврильев дьиэ кэргэнэ.
Дмитрий Николаевич1938 сыллаахха атырдьах ыйын 24 күнүгэр Амма сиригэр Амма-Наахара нэһилиэгэр күн сирин көрбүтэ. 1972 сыллаахха Саха судаарыстыбаннай университетын саха салаатын бүтэрбитэ. “Ленин знамята”, “Саҥа олох”, “Коммунизм тутуута” оройуон хаһыаттарыгар үлэлээбитэ. 1962 сыллаахтан Аҕа дойду Улуу сэриитин кэмигэр сураҕа суох сүппүт дьону көрдүүр чинчийэр үлэтин саҕалаабыта. Дмитрий Николаевиһы чинчийэр үлэтин соноро Москва, Ленинград, Подольскай, Смоленскай, Иркутскай, Курскай, Харьков куораттар байыаннай архыыптарыгар уонна Россия, Саха Республикатын Куттал суох буолуутун архыыптарыгар тиэрдибитэ. Бу улахан үлэ түмүгүнэн Аҕа дойду Улуу сэриитин кыттыылаахтарын уонна политикалыы репрессияҕа толук буолбуттары – тыһыынчанан Саха сирин дьонун туһунан саҥа чахчылар көстүбүттэрэ. Чинчийээччи бу матырыйааллара республика уонна улуус хаһыаттарыгар бэчээттэнэн тыһыынчанан сиик буолан симэлийбит биитэр дьылҕалара ситэ биллибэтэх дьон аймахтарыгар илдьит буолбуттара. Сорсуннаах суруксут сыралаах үлэтэ 24 кинигэҕэ түмүллэн, биэс хайысхалаах картотека оҥоһуллан аата-суола Саха сирин тас өттүгэр биллэр документалист-суруйааччыга кубулуйбута.
Дмитрий Николаевич киэҥ далааһыннаах үлэтэ сыаналанан Саха Республикатын культуратын үтүөлээх үлэһитин, Амма улууһун уонна бу улуус Абаҕа, Амма нэһилиэктэрин, Таатта улууһун Баайаҕа нэһилиэгин ытык киһитин бочуоттаах ааттарын сүкпүтэ, дойду таһымыгар бэлиэтэнэн Бүтүн Россиятааҕы “России верные сыны” күрэс лауреата буолбута. Төрөөбүт сиригэр – Өнньүөскэ биир уулусса кини аатын сүгэр.
Дмитрий Николаевич кыыһа Саха Республикатын адвокаттарын коллегиятын чилиэнэ Мария Гаврильева уонна «Чолбон» сурунаал бас эрэдээктэрэ Гаврил Андросов «Чолбон» сурунаал Дмитрий Николаевич Гаврильев аатынан кыраайы үөрэтиигэ бириэмийэни «Артамонов атыыһыт туһунан аҕыйах тыл» ыстатыйатын иһин, Панкратий Иванович Шадрин аатынан Өктөм орто оскуолатын биологияҕа учуутала, Бүтүн Россиятааҕы история уонна культура пааматынньыктарын харыстыыр уопсастыба Хаҥалас улууһунааҕы салаатын салайааччытыгар Петр Саввич Федотовка туттардылар. Мария Дмитриевна бу бириэмийэни туттарыы сыл ахсын буолуо диэн эттэ.
