Бүгүн, бэс ыйын 25 күнүгэр, «Книжный ветер» II Аан дойдутааҕы фестиваль чэрчитинэн Комсомольскай болуоссакка «Чолбон» сурунаал «Ааҕыыга тапталтан – суруйууга» диэн маастар-кылааһы тэрийэн ыытта. Манна бас эрэдээктэр, поэт Гаврил Андросов, бас эрэдээктэри солбуйааччы, прозаик, тылбаасчыт Данил Макеев, прозаик Анатолий Слепцов прозаны суруйууга, кэпсээн тутулун таҥыыга сүбэ-ама биэрдилэр, билиҥҥи проза туругун туһунан санааларын үллэһиннилэр, сурунаал хайдах-туох үлэлии-хамсыы олорорун сырдаттылар. Тэрээһиҥҥэ литератураны сэҥээрэр, ааҕар, суруйар дьон мустан суруйааччылары кытары атах тэпсэн олорон кэпсэттилэр. Кинилэр саха билиҥҥи прозата Россия, аан дойду таһымыгар тахсарыгар туох кыах баарый, «Чолбон» эдэр суруйааччы оскуолата диэни тэрийиэ дуо диэн бэйэлэрин долгутар ыйытыыларыгар хоруйдары ылан астыннылар. Маастар-кылааска номнуо бэйэлэрэ ааҕааччылардаах суруйааччылар Иван Попов-Уһук Уйбаан, Валерий Андросов уонна эдэр прозаиктар, «Чолбон» айар кыһата» бырайыак кыттааччылара Мария Винокурова-Мааны Маарыйа, Сардаана Корякина, Светлана Егорова сырыттылар, айар үлэҕэ сүбэ-соргу ыллылар.
Айталина Кошунова, истээччи: «Суруйааччылары көрсөн, кинилэр санааларын истэн олус астынныбыт. «Чолбон» сурунаал саҥа саҕалыыр дьоҥҥо анаммыт бырайыактарын кэпсээбиттэрин, аныгы прозаны сайыннарыахтаахпыт диэбиттэрин истэн олус сэргээтибит. Тоҕо диэтэр, билиҥҥи түргэн тэтимнээх олоххо ордук ыччат дьон кылгаһы, судургуну тала сатыыр. Онон кэпсээни ааҕыыттан саҕалаан ыччаппыт улахан жанрдары да хото ааҕар буолуоҕа дии саныыбын. Уонна суруйааччылар эппиттэрин курдук, билиҥҥи олох кыһалҕаларын таарыйар айымньылар суохтарын кэриэтэ диэҥҥэ олох сөбүлэһэбит. «Чолбоннор» эдэр дьону суруйууга көҕүлүүр сыалтан араас тэрээһиннэри ыытыахпыт, айымньыларын ырытыахпыт диэбиттэрин сэргии, сөбүлүү иһиттибит. Сурунаалга сайдыыны эрэ баҕарабыт».
Гаврил Андросов, «Чолбон» сурунаал бас эрэдээктэрэ: «Бу фестивальга биһиги, бастатан туран, партнедарбыт – СӨ Киин библиотекатын үлэтин-хамнаһын өйөөн кытынныбыт, иккиһинэн, манна кэлбит дьоҥҥо сурунаалбыт үлэтин-хамнаһын билиһиннэрдибит. Быйылгыттан «Чолбон» айар кыһата бырайыагы күүскэ үлэлэтэн эрэбит. Бу бырайыак сүрүн сыала – саха прозатыгар сонун темалары арыйыы, ааптардарбыт айар-суруйар таһымнарын үрдэтии. Бу кыһа үлэтин күһүҥҥүттэн күүскэ үлэлэтэр санаалаахпыт. Онон ол үлэбит хайдах тосохоллоох буоларын холоон көрүү быһыытынан бу маастар-кылааһы ыыттыбыт. Бүгүн кэлэн кыттыбыт дьоммутугар барҕа махталбытын тиэрдэбит».
Маастар-кылаас туһунан Дмитрий Никонов устуутун бу сигэнэн көрүҥ.
Анна Прудецкая, Анастасия Еремеева
