Балаҕан ыйын 23 күнүгэр «Чолбон» сурунаал М.К. Аммосов аатынан ХИФУ Хотугулуу-Илиҥҥи норуоттар тылларын уонна култуураларын институтун саха литературатын кафедратын «Литература үлэһитэ» идэтигэр үөрэнэр устудьуоннарыгар уонна уһуйааччыларыгар бэйэтин ааптарын, саха норуотун суруйааччытын Павел Харитоновы–Ойукуну илдьэн ыалдьыттатта. Көрсүһүү «Чолбон» сурунаалга 2011 сыллаахха тахсыбыт суруйааччы оскуоланы бүтэрээри сылдьан суруйбут күннүгүн тула буолан ааста.
Тэрээһини «Чолбон» сурунаал эрэдээктэрэ Туяра Павлова арыйда. Суруйааччыны кытта университекка бииргэ үөрэммит педагогика наукатын доктора, профессор Евдокия Поликарпова Ойуку туһунан кылгастык билиһиннэрдэ. «Чолбон» сурунаал бас эрэдээктэрин солбуйааччы, прозаик Данил Макеев сурунаал туһунан кэпсээнин устудьуоннар олус сэргии иһиттилэр. Филология наукатын кандидата Татьяна Васильева Ойуку айар үлэтигэр анаммыт быыстапканы билиһиннэрдэ, «Бубенцы над Леной», «Хоболоох суол» айымньыларын кылгастык сырдатта. Павел Николаевич бэйэтэ күннүгүн хаһан, хайдах суруйан саҕалаабытын олус кэрэхсибиллээхтик кэпсээтэ. Устудьуоннар күннүк туһунан сэҥээрэр ыйытыыларын биэрдилэр.
Камила Михайлова, С-ЛТ-23 бөлөх устудьуона:
— Бүгүн норуот суруйааччыта Павел Харитонов–Ойукуну кытта олус үчүгэй көрсүһүү буолан ааста. Павел Николаевич тула олорон устудьуоннар ыйытыыларбытын биэрдибит. Кини төһө кыалларынан боппуруостарга аһаҕастык хоруйдаата. Көрсүһүү аһаҕастык, истиҥник ааста. Суруйааччы бэйэтэ этэринэн, бу маннык ыччаты кытта көрсүһүүлэр олус суолталаахтар. Оттон биһиэхэ, устудьуон дьоҥҥо, литература эйгэтигэр үөрэнэ, үлэлии сылдьар ыччакка бу маннык тэрээһиннэр элбэҕи биэрэллэр. Инникитин үөрэхпитигэр, айар үлэбитигэр уонна баһылыыр идэбитигэр даҕаны көдьүүстээх буолар.
Светлана Егорова, С-ЛТ-22 устудьуона:
— Наһаа үчүгэй, туһалаах тэрээһин ааста диэн санаатым. Ойуку ыччакка даҕаны, саҥа суруйан эрэр эдэр дьоҥҥо даҕаны биэрбит сүбэлэрэ хайаан да туһалаах буолуо диэн эрэнэбин.
Ньургуйаана Дмитриева, С-ЛТ-23 устудьуона:
– Устудьуоннар олус сэргээн иһиттибит. Биһиги кэпсэтиибит Ойуку күннүгүн тула буолла. Күннүгү аахпыт устудьуоннар элбэҕи ыйыттылар. Суруйааччы бэйэтин санаатын толору эттэ. Биһиги элбэҕи биллибит, онон көрсүһүү буолбута наһаа кэрэхсэбиллээх уонна биир өттүнэн дьоллоох түгэн да диэххэ сөп – саха норуотун суруйааччытын илэ көрдүбүт, кэпсэттибит, элбэх сүбэ-ама тылы иһиттибит. Павел Николаевич сүбэтэ олохпут тухары бу айар дьоҥҥо күүс-көмө буолуоҕа диэн эрэнэбин.
Настя Мордовская, С-ЛТ-22 бөлөх устудьуона:
— Павел Николаевич устудьуоннары кытта аһаҕастык кэпсэттэ. Биһиги, «Литература үлэһитэ» салаа устудьуоннара, суруйааччы буолуохпутун сөп. Онно анаан олус туһалаах сүбэлэри биэрдэ. «Элбэхтик ааҕар уонна үлэлиир эрэ киһи суруйааччы буолар кыахтаах», — диэн эттэ. Күннүгүн онус кылаастан суруйан саҕалаабыт, онно уол оҕо улаатан, уларыйара, кэҥиирэ көстөр.
Бу курдук устудьуоннар атах тэпсэн олорон Павел Харитонов–Ойукуну кытта бэрт сэргэхтик кэпсэттилэр. Кинилэр суруйааччы күннүгэ кини киһи буолан чочуллан, уһаарыллан тахсыбытыгар төһүү буолбутун, бэйэни иитинии бу олоххо олус суолталааҕын өйдөөтүлэр.
Көрсүһүү түмүгэр «Литература үлэһитэ» салаа устудьуоннара уонна салайааччылара «Чолбон» сурунаалга 2027 сылга сурутууну Павел Николаевичка уонна уһуйааччыларыгар Евдокия Михайловнаҕа бэлэхтээтилэр! Бу эдэр дьон холобурунан ким баҕалаах аҕа саастаах дьоҥҥо сурунаалбытыгар сурутуу бэлэхтиэн сөп.
Сайыына Черкашина
