Бүгүн, балаҕан ыйын 3 күнүгэр, Саха Өрөспүүбүлүкэтин Национальнай уус-уран ойуулуур-дьүһүннүүр музейыгар арыллыбыт «Colbon oju:ta» быыстапкаҕа Хотугулуу-Илиҥҥи норуоттар тылларын уонна культураларын институтун иккис уонна үһүс куурсун устудьуоннара сырыттылар. Ыччат саха литературатын уонна искусствотын ситимин олус кэрэхсии көрдө.
«Экскурсовод быыстапканы наһаа үчүгэйдик кэпсээтэ. «Чолбон» сурунаал 100 сылыгар анаммыт быыстапка бэлиэ суолталаах. Биһиги худуоһунньуктарбыт – Сэбиэскэй Сойууска биллибит графиктар үлэлэрэ наһаа үчүгэйдик, толорутук көрдөрүллүбүт. Онон биһиги бэрт сэргэх, интэриэһинэй уонна дириҥ ис хоһоонноох быыстапкаҕа сырыттыбыт», — Людмила Ефимова, культурология кафедратын сэбиэдиссэйэ.
«Манна мин саамай сөбүлээбитим — худуоһунньуктар араас техниканан туһанан, олус үчүгэй хартыыналары айбыттар. Хартыыналары көрөн сөхтүм, астынным, дуоһуйдум», — МХК-25 бөлөх устудьуона.
« «Чолбон» сурунаал 100 сылыгар анаммыт быыстапканы олус сэргии, астына көрдүбүт. Экскурсовод барытын сиһилии сырдатта. Худуоһунньуктар бэйэлэрин санааларын, көрүүлэрин кумааҕыга уруһуй нөҥүө хайдах тиэрдэллэрин көрдүм. Араас ньыманан оҥоһуллубут үлэлэри көрөн сөхтүм-махтайдым. Сахабыт сирин устуоруйатын кэпсээбиттэрэ билиибитин-көрүүбүтүн кэҥэттэ», — Владимир Васильев, ОРНХТ-24 устудьуона.
Санатар буоллахха, быыстапкаҕа Саха сирин биллэр худуоһунньуктара Эллэй Сивцев, Валериан Васильев, Михаил Старостин, Ефим Шапошников, Сэксэй Парников, Дьулустаан Бойтунов, Николай Курилов, Юрий Вотяков айымньылара көрөөччү дьүүлүгэр тураллар. Кинилэр үлэлэрэ саха литературатын дириҥ ис хоһоонун, Олоҥхо күүһүн уонна кинигэ графикатын уратытын чаҕылхайдык арыйаллар.
Быыстапка саха литературатын уонна искусствотын таптыыр, сэҥээрэр дьоҥҥо кэрэхсибиллээх буолуоҕа. Быыстапка балаҕан ыйын 6 күнүгэр диэри үлэлиир.
Сайыына Черкашина
