РФ Президенин ыйааҕынан Россия норуодунай артыыһыгар Андрей Борисовка «Үлэ геройа» үрдүк аат иҥэрилиннэ. Бу туһунан Ил Дархан Айсен Николаев МАХ-ханаалыгар үллэһиннэ.
«Андрей Саввич – Россия норуодунай артыыһа, ССРС уонна Россия судаарыстыбаннай бириэмийэлэрин лауреата, «Көмүс мааска» хаһаайына, өрөспүүбүлүкэ бочуоттаах олохтооҕо.
Кини үйэ чиэппэрин кэриҥэ Саха өрөспүүбүүлүкэтин култуура уонна духуобунай сайдыыга миниистиринэн үлэлээбитэ, Арктикатааҕы культура уонна искусство судаарыстыбаннай институтун, Олоҥхо тыйаатырын төрүттээбитэ. Кини аатын кытта ЮНЕСКО Олоҥхону билиниитэ уонна саха киинэтэ атаҕар туруута ситимнээх. Уһулуччулаах режиссер, тыйаатыр оскуолатын төрүттээччи уонна хас да көлүөнэ артыыстары уһуйбут Андрей Саввич бүгүн Арктикатааҕы эпос уонна искусство киинин салайааччытын быһыытынан санааларын олоххо киллэрэр.
Мин Андрей Саввичтыын элбэх сыл бииргэ үлэлиибин уонна кини киэҥ далааһыннаах толкуйун уонна көҥүлүн, айар хорсунун уонна саамай уустук сонун санааларын олоххо киллэрэр дьоҕурун дириҥник сыаналыыбын. Кини «Үлэ Геройун» аатын Саха сиригэр Култуура сылыгар – кини олоҕун дьыалатыгар анаммыт сылыгар ылбыта ордук бэлиэ. Бу үрдүк наҕараада биһиги өрөспүүбүлүкэбит култууратын харыстыыр уонна сайыннарар дьон барыларын үлэтин билинии буолар. Андрей Саввиһы дойду үрдүк наҕараадатынан эҕэрдэлиибин. Чэгиэн доруобуйаны, эрчими уонна саҥа былааннары баҕарабын. Инникитин кинини Саха сирин уонна бүтүн Россия култууратыгар суолталаах өссө элбэх чаҕылхай ситиһиилэр күүтэллэригэр эрэнэбин», — диэн Ил Дархан бэлиэтээтэ.
