«Чолбон» сурунаал эрэдээксийэтэ ааспыт 2023 сылга П.А. Ойуунускай аатынан судаарыстыбаннай бириэмийэ лауреата, ХИФУ доцена, саха уус-уран литературатын кириитикэтин историятын чинчийээччи, уус-уран литература кириитигэ Василий Никитич Протодьяконов кэриэһигэр уус-уран литература кириитикэтигэр сабыылаах күрэһи үһүс төгүлүн ыытта. Санатар буоллахха бу күрэс икки сылга биирдэ ыытыллар.
Сааһынан уонна айар-чинчийэр таһымынан хааччаҕа суох сабыылаах күрэскэ уус-уран литература биир уустук уонна ураты салаатыгар – кириитикэҕэ 22 үлэ киирдэ. Саха литературатын кэрэхсээччилэр бэл ыраах сытар Орто Халыматтан, ону тэҥэ Сунтаар, Үөһээ Бүлүү, Кэбээйи, Бүлүү, Томпо, Таатта, Чурапчы, Горнай улуустарыттан уонна Дьокуускай куораттан кытыннылар. Кыайыылаахтарга наҕараадалары Василий Никитич аймаҕа Саха Республикатын норуотун хаһаайыстыбатын үтүөлээх үлэһитигэр Михаил Александрович Протодьяконов уонна “Саха сирин суруйааччыта” ассоциация бэрэссэдээтэлэ, филогия наукатын кандидата Олег Гаврильевич Сидоров туттардылар.
Василий Никитич Протодьяконов кэриэһигэр уус-уран сабыылаах күрэскэ I миэстэни
СВЕТЛАНА НИКОЛАЕВНА САМСОНОВА, Баһылай Харысхал “Халаачык Муос” сэһэнин ырытыытын иһин (Кэбээйи улууһун Мукучу нэһилиэгэ)
Василий Никитич Протодьяконов кэриэһигэр уус-уран сабыылаах күрэскэ II миэстэни:
СВЕТЛАНА АЛЕКСЕЕВНА ВИНОКУРОВА, Борис Павлов-Кэм хоһооннорун ырытыы иһин (Томпо улууһун Мэҥэ Алдан нэһилиэгэ)
Василий Никитич Протодьяконов кэриэһигэр уус-уран сабыылаах күрэскэ III миэстэни
ИНАРА СТЕПАНОВНА ФЕДОРОВА, Анатолий Слепцов “Ахтылҕан” кэпсээнин ырытыытын иһин (Дьокуускай куорат) ыллылар.
Василий Никитич Протодьяконов кэриэһигэр уус-уран сабыылаах күрэскэ “Кэскиллээх критик” анал бирииһи ылла
САРДААНА АНДРЕЕВНА ТОМСКАЯ, «Рафаэль Баҕатаайыскай уонна Афанасий Гуринов «Алмаас уонна хара дьай: детективнэй сэһэн»» ырытыытын иһин, М.К.Аммосов аатынан ХИФУ РФ Хотугулуу-илиҥҥи норуоттар тылларын уонна культураларын институтун 5 кууруһун устудьуона.
«Уһун тиһиккэ» киирэн «Чолбон» сурунаалга бэчээттэнэргэ мэктиэлэннилэр:
БУРХАЛЕЙ СТЕПАНОВИЧ МАКАРОВ, Миитэрэй Наумов айымньыларын ырытыы иһин, (Үөһээ Бүлүү улууһун Үөдүгэй нэһилиэгэ),
ГАЛИНА ИННОКЕНТЬЕВНА НЕУСТРОЕВА, Баһылай Харысхал “Халаачык Муос” сэһэнин ырытыы иһин, (Таатта улууһун Баайаҕа нэһилиэгэ),
ИЗАБЕЛЛА ЕГОРОВНА НОГОВИЦЫНА, Николай Лугинов «Кустук» уонна Дмитрий Наумов «Кэрэмэс» кэпсээннэрин ырытыы иһин (Орто Халыма улууһун I Хаҥалас нэһилиэгэ),
ЛЕНА АНАНЬЕВНА РОМАНОВА, Наталия Рязанская кэпсээннэрин ырытыы иһин (Дьокуускай куорат)
ВАСИЛИСА РОМАНОВНА ШИШИГИНА Баһылай Харысхал «Ааспыт кэм аартыктарынан» документальнай-историческай романын ырытыы иһин (Дьокуускай куорат).
