Быйыл муус устар 22 күнүгэр 1996–2005 сылларга «Чолбон» сурунаал бас эрэдээктэринэн үлэлээбит СӨ култууратын үтүөлээх үлэһитэ, ССРС суруйааччыларын сойууһун чилиэнэ, прозаик, литература кириитигэ, тылбаасчыт Петр Денисович Аввакумов төрөөбүтэ 90 сылын туолла. Кини саха литературатыгар 90-c сыллардааҕы уларыйыы кэмин туһунан бөдөҥ айымньылары суруйан хаалларбыт ааптар быһыытынан биллэр. Суруйааччы бэлиэ күнүгэр аналлаах тэрээһин муус устар 26 күнүгэр П.А. Ойуунускай аатынан литература судаарыстыбаннай музейыгар буолан ааста.
Горнай улууһун баһылыга Никита Андреев суруйааччы төрөөбүт сиригэр Күөрэлээххэ өрөспүүбүлүкэтээҕи ааҕыылар үрдүк таһымҥа ыытыллыбыттарын, суруйааччы Айысхаана Петр Денисович кириитик быһыытынан үлэлэрин кинигэ оҥорбутун таһаарыахпыт диэн иһитиннэрдэ. Итиэннэ, суруйааччы холоонноох доҕоругар Матрена Ивановнаҕа «Улуус духуобунай попечителэ» диэн бэлиэни туттарда. Оттон Октябрьскай нэһилиэк баһылыга Алексей Петров Петр Денисович олорбут Марба өтөҕөр өйдөбүнньүк бэлиэтин туруорбуттарын кэпсээтэ.
Биир идэлээхтэрин туһунан норуот суруйааччыта Николай Лугинов, Сэмэн Тумат, суруйааччылар Николай Курилов, Айысхаана, Данил Макеев үтүө тылынан аҕыннылар. Ол курдук, Духуобунас академиятын вице-президенэ, норуот суруйааччыта Николай Лугинов: «Бүөтүр курдук литератураҕа бэриниилээх киһи суоҕа буолуо», – диэн дьоһун сыанабылы биэрдэ, Урсуннуун Софрон Данилов нэһилиэстибэтэ күн сирин көрөрүгэр улахан кылааты киллэрбиттэрин бэлиэтээтэ. Саха сирин суруйааччыларын сойууһун иһинэн Эдэр литератордар сүбэлэрин кыттыылааҕа, Маҕарас оскуолатын учуутала Мария Андреева суруйа сылдьар магистрдыы үлэтигэр сигэнэн прозаик романнарыгар санаатын үллэһиннэ.
Петр Денисович биир дойдулаахтара, үөлээннээхтэрэ – РФ үрдүк үөрэҕин үтүөлээх үлэһитэ Иннокентий Сивцев, РФ үтүөлээх юриһа Макар Яковлев, дьиэ кэргэнинэн доҕордоспут Татьяна Маркова кинини киһи, доҕор уонна төрөөбүт дойдутун патриотун быһыытынан истиҥник аҕыннылар.
П.Д. Аввакумов аатынан Горнай улуустааҕы киин библиотека ситимин дириэктэрэ Анна Иванова суруйааччы олоҕор уонна айар үлэтигэр аналлаах ыйынньык оҥоро сылдьарын билиһиннэрдэ.
Петр Денисович олоҕун аргыһа Матрена Ивановна аҕаларын дьон-сэргэ, горнайдар уонна суруйааччылар умнубаттарын, үйэтитэр үлэ барарын иһин барҕа махталын эттэ.
«Чолбон» сурунаал эрэдээксийэтэ