ХХIүйэ уһулуччулаах худуоһунньуга, айылҕаттан айдарыылаах киистэ талааннаах маастара, сахалартан бастакы академик А.Н.Осипов бүгүн төрөөбүтэ 95 сылын бэлиэтиибит. «Чолбон» сурунаалга Афанасий Николаевич үбүлүөйдээх сылларыгар тахсыбыт ыстатыйалары кытта билиһиннэрэбит. Баҕар сороххут аахпыта буолуо.
Ол курдук, 2010 сыл 10-с нүөмэригэр Владимир Парфенов «Академик Афанасий Осипов триптихтэрэ ыстатыйа” 2018 сыллаахха 2–с нүөмэргэ “Афанасий Осипов сахалартан бастакы академик» (А.Н.Осипов төрөөбүтэ 90 сылын көрсө), 2012 сыл 11-с нүөмэригэр “Академик Афанасий Осипов Черногориятааҕы серията” уонна 2022 сыл 4-с нүөмэригэр Ильина Надежда «Хотугу хайалартан – Сибиир истиэбигэр: худуоһунньук айар суола” ыстатыйалар тахсыбыттар. Надежда Ильина ыстатыйатыгар Афанасий Николаевич кыыһа Россия Худуоһунньуктарын сойууһун чилиэнэ Анна Осипова — аныгы кэм биир биллэр-көстөр ураты буочардаах талааннаах худуоһунньуга буолара сырдатыллыбыт. Семен Семенович Баишев диэн 90-с сыллардаахха Өймөкөөн хайаларыгар айанныырыгар Афанасий Николаевичка элбэхтэ сирдьиттээбит табаһыт идэлээх киһи Аннаҕа эрийбит. Афанасий Осипов аатын үйэтитэргэ кини уруһуйдаабыт хайатыгар 2450 м үрдүктээх сиргэ өйдөбүнньүк дуоска туруорар туһунан санааны эппит. Семен Семенович ыллыктаах этиитин ис сүрэҕиттэн өйөөн, былырыын кыһыҥҥыттан сайын айанныырга диэн былааннаабыттара. 2021 сыл сайын Сахабыт сирин үрдүнэн өтөрүнэн буолбатах баһаар туран, күлүм гынан ааһар күөх сайыммыт ыыс-быдаан буруонан бүрүллэн, экспедиция айанныыр сиригэр хойуу буруо да турдар айанньыттар сыалларын сиппиттэр. ССРС норуодунай худуоһунньуга Афанасий Осиповка аналлаах өйдөбүнньүк дуосканы туруорбуттара. Бу материаллары QR – кодунан киирэн сурунаал архыыбыттан булан ааҕыаххытын сөп.
