Перейти к содержимому
Сүрүн сирэй » Сонуннар » Сэрии күн төрөөбүтүм…

Сэрии күн төрөөбүтүм…


Павел Харитонов-Ойуку, норуодунай суруйааччы

Саныахха быраман да сыллар

 Силлиэрэн, ытыллан аастылар.

Огдообо, тулаайах диэн тыллар

 Баастара чэрдийэн остулар.

 Кыайыы күн төрөөбүт оҕолор

Сэттэ уон сааскытын туоллугут,

Сэриини билбэтэх дьоллоохтор

Эһэлэр, эбэлэр буоллугут.

 Өстөөхтөр даҕаны өлбүттэр –

Буускалар тиҥийэн ыппаттар.

Кэллэ дуо, ол кэми умнарбыт –

Бэл, тимир дьэбиҥҥэ кыайтарбыт.

 Арай мин сэрии күн төрөөммүн,

Бадаҕа, барытын өйдүүбүн

Ветеран дьоннору көрсөммүн

 Кыайыыны, сэриини түһүүбүн.

Ол сэрии буойунун кытары

 Охсуһуу үөһүгэр сылдьабын,

 Былааҕын күөрэччи тутаммын

Өрөгөй салгынын тыынабын.

 Охтубут саллааты быыһаары

 Өлөр да, тиллэр да курдукпун,

Киниэхэ көмөҕө тиийээри

Бүгүн да, тиэтэйэр буолбуппун.

 Уот сэрии тэргэнэ ытыалыыр

 Дуораана ырааттар ыраатар…

Арай мин тиэргэммэр чугаһыыр –

 Сүрэҕим күннэтэ сэрэтэр