Хотугу дойду киhитэ –
Мин эһиэхэ этиэм этэ:
– Дьылҕам хаартан төрүттээх!
– Дьылҕам хаартан төрүөттээх!
– Кэлэр кэскилим үөрүүтэ
Эмиэ хаартан төрүөхтээх!
Норуодунай суруйааччы Семен Данилов бу хоһоонунан «Үрүҥ хаар алгыha» диэн ааттаммыт VII норуоттар икки ардыларынааҕы поэзия түһүлгэтэ поэзия киэһэтинэн түмүктэннэ. Алтынньы 13 күнүгэр Өксөкүлээх Өлөксөй аатынан Доҕордоһуу дьиэтигэр «Чолбон» сурунаалбыт алтынньытааҕы нүөмэригэр киирбит түһүлгэ ыалдьыттарын сахалыы тылбаастаммыт хоһооннорун бастаан ааптардар, онтон тылбаасчыттар аахтылар. Ол курдук, Архангельскайдааҕы айар холбоһук салаатын салайбыт поэт, прозаик, тылбаасчыт Елена Кузьмина «Таҥнарбыт ойох» хоһоонун норуодунай суруйааччы Наталья Харлампьева,
«Из века в век» антологияҕа саха поэзиятын томун таһаартарбыт поэт Сергей Гловюк «Хоруобуйам эмиэ хаарынан кылбайда» хоһоонун норуодунай суруйааччы Сэмэн Тумат тылбаастаабытын поэт Ольга Янцен,
Азербайджан поэта Рамиз Кусайчарлы «Кыһыҥҥы хайалар» хоһоонун норуодунай суруйааччы Сэмэн Тумат тылбааһын Саха театрын артыыската Сандаара Федотова,
Сергей Есенин аатынан Бүтүн Россиятааҕы поэзия күрэһин кыайыылааҕа Анна Токарева «Бэс хатырыгар иэдэспин оргууй даҕайан» хоһоонун поэт, драматург Надежда Ильина,
филология наукатын кандидата Татарстан поэта Айрат Бик-Булатов «Мин суолум…» хоһоонун поэт, Саха сирин суруйааччыларын сойууһун председателэ Гаврил Андросов,
поэт, бортпроводник үлэлээх Александр Хватков “Киэн туттуум!” хоһоонун поэт Рустам Каженкин тылбааһын поэт Елизавета Мигалкина,
Дагестан Өрөспүүбүлүкэтин культуратын үтүөлээх үлэһитэ, поэт Супиянат Мамаева хоһоонун «Далбар Хотун» сурунаал бас эрэдээктэрэ, поэт Зинаида Архипова,
Кыргызстан норуодунай поэта Кожогелди Күлтэгин “Кыһыҥҥы сири эргиччи көрөөт” хоһоонун (бу поэт 30-ча хоһоонун тылбаастаабыт) норуодунай суруйааччы Елена Слепцова-Куорсуннаах тылбааһын Сандаара Федотова,
Алампа «Ыллыым ээ, ыллыым» хоһоонун немецтии, итальянскайдыы, французтуу тылбаастаппыт, Италия, Югославия, Македония, Сербия, Австрия, Япония литератураҕа бириэмийэлэрин, Бунин бириэмийэтин лауреата Вячеслав Куприянов «Алланнаах Бүлүү уута Ленаҕа суураллар…» хоһоонун Гаврил Андросов, С. Есенин,
Г. Державин, В. Маяковскай, Дмитрий Кедрин ааттарынан литература бириэмийэлэрин лауреата Нина Попова «Манна үгэстэр уонна мастар» хоһоонун Елена Слепцова – Куорсуннаах тылбааһын Саха драматическай театрын артыыската Настя Иванова,
Казахстан поэта Алмат Исадилов «Кыһын» хоһоонун поэт Яна Байгожаева тылбааһын Сандаара Федотова аахтылар. Киэһэни казах, татар омук итиэннэ “Потомки государевых ямщиков” ансамбль ырыалара киэргэттилэр.
Ити курдук салгыы араас бырайыактарга тэҥҥэ үлэлэһэргэ элбэх былааннаах иэйиилээх түһүлгэ түмүктэннэ.