Перейти к содержимому
Сүрүн сирэй » Сонуннар » «Мин олоххо аналым – сомоҕолоһуу идеятын тиэрдии»

«Мин олоххо аналым – сомоҕолоһуу идеятын тиэрдии»


Норуот суруйааччыта Николай Лугинов дьоро киэһэтэ

Ахсынньы 16 күнүгэр П.А. Ойуунускай аатынан Саха академиялыы театрыгар норуот суруйааччыта, РФ культуратын үтүөлээх үлэһитэ, П.А. Ойуунускай аатынан СӨ судаарыстыбаннай бириэмийэтин лауреата, Россия Суруйааччыларын сойууһун Үрдүкү айар сүбэтин чилиэнэ, Лао-Цзы Бүтүн Кытайдааҕы уопсастыбатын бэрэссэдээтэлин солбуйааччы, СӨ Духуобунаска академиятын вице-президенэ Николай Алексеевич Лугинов 75 сааһын бэлиэтиир өрөгөйдөөх киэһэтэ буолла.

Дьоро киэһэ телесуруналыыс Евдокия Избекова устубут «Думы о империи» диэн киинэ уочарка көрүүнэн саҕаланна. Киинэ суруйааччы үбүлүөйүн дойду тэбэр сүрэҕэр Москваҕа бэлиэтээһини уонна Пекиҥҥэ буолбут «Уларыйыы кэмэ» роман кытайдыы тахсыытын сүрэхтэниитэ хайдах барбытын эмиэ хабар.

        Саха театрын салайааччылара – уус-уран салайааччы, РФ норуодунай артыыһа Андрей Борисов, дириэктэр Петр Макаров, бас режиссер Руслан Тараховскай үбүлээри эҕэрдэлээн туран өрөгөйдөөх тэрээһини саҕалаатылар.

Дьэ, ол кэннэ театр сыанатыгар турбут “Алампа, Алампа…”, “Максим”, “Чыҥыс-Хаан ыйааҕынан”, “Улуу Хууннар”, “Кустук” испэктээкиллэртэн быһа тардыы уонна “Суол” дьүһүйүү утум-ситим салҕанан истилэр. Биир ураты түгэнинэн норуотун суруйааччытын кэлиҥҥи айымньыларыттан биирдэстэрэ “Дабайыы” матыыбынан туруохтаах саҥа испэктээкилтэн быһа тардыы көстүбүтэ буолла.

Дьүһүйүү быыһыгар эҕэрдэлэр этилиннилэр. Бырабыыталыстыба бэрэссэдээтэлин солбуйааччы Сергей Местников: “Николай Алексеевич үбүлүөйдээх сыла өрөспүүбүлүкэ үрдүнэн киэҥ далааһыннаахтык ааста. Суруйааччы бэйэтин көрдөһүүтүнэн Кытайга «Уларыйыы кэмэ» кинигэтин сүрэхтэниитин тэрийэн ыыттыбыт. Бэйэтин айымньыларын нөҥүө норуот историятын, култууратын уонна искусствотын сиһилии билиһиннэрбит идэтинэн математик учуутал суруйааччы айымньылара көлүөнэлэри иитэ-үөрэтэ турарыгар баҕарабын”, – диэн эттэ.

Культура уонна духуобунай сайдыы миниистирэ Афанасий Ноев эҕэрдэ тылыгар: “Хас биирдии киһи олорор судаарыстыбатын ытыктыахтааҕын, дойдутун патриота буолуохтааҕар иитэр айымньыларынан Николай  Алексеевич көлүөнэлэри ситимнээбит улуу киһибитинэн буолар”, – диэн бэлиэтээтэ. М.К.Аммосов аатынан ХИФУ президенэ Евгения Михайлова норуот суруйааччытын университет бастыҥ выпускнигынан ааттаата. “Саха сирин суруйааччыта” ассоциацияларын бэрэссэдээтэлэ Олег Сидоров суруйааччы “Хас биирдии киһи сүрэҕэр тоҥсуйан тиийиэхтээхпит диэн сүрүн быраабылалааҕын” санатта. Саха сирин суруйааччыларын сойууһун бэрэссэдээтэлэ Гаврил Андросов саха литературата түүр тыллаах омуктар литератураларын кытта быһаччы ситимнээҕин уонна ону XI үйэҕэ олорон ааспыт поэт Юсуф Баласагуни “Дьоллоох буолуу туһунан үөрэх” диэн поэматын сэргэ Николай Лугинов “Чыҥыс-Хаан ыйааҕынан” трилогията салайааччылары уонна баһылыктары иитэр аналлаахтарыгар көстөрүн санатта. Кинилэри сэргэ Анал байыаннай операция кыттыылааҕа, эдэр поэт Анатолий Храмов, Кэбээйи улууһун дьаһалтатын баһылыгын солбуйааччы Анна Попова эҕэрдэлээтилэр.

         Отут кинигэтиттэн уон алтата араас омук тылынан тылбаастаммыт норуот суруйааччыта Николай Лугинов 75-с хаарыгар үктэнэн туран 53 сыллаах айар үлэтин отчуотунан дьоро киэһэ түмүктэннэ.

«Чолбон» сурунаал эрэдээксийэтэ