Перейти к содержимому
Сүрүн сирэй » Поэзия » «Өйдөөх тыл биллиэ – өлбөт кэм кэлиэ!»

«Өйдөөх тыл биллиэ – өлбөт кэм кэлиэ!»


(Бэргэн этиилэр)

Бэйэбэр

Мин үлэлэрбин
Бэлэмнээх киһи өйдүүр,
Мин бэлиэлэрбин
Илгэлээх киһи өйүүр.
(К., 106 с.)

Көтөҕүллүү

Ийэ тыл
тыыннааҕын тухары –
Ол омук чөл тыыннаах,
Төрүт хаан
ааттааҕын тухары –
Алгыс диэн санаалаах!
(К., 119 с.)

Боотур көмүскэлэ

Саха олоҕо –
Чараастан чараас,
Саха холбоҕо –
Ыраастан ыраас.
(К., 229 с.)

Хаар

Халлаантан айылҕа сүөгэйэ
Хаар түһэр,
Иннибэр нарыннык күөгэйэ
Кыыс иһэр…
(МС., 271 с.)

Ырыа

Ырыа диэн сүрэх –
Мин сүргэбин!
Ырыа диэн үрэх –
Мин күргэбин!
(К., 181 с.)

Төрөөбүт дойду

Дьиҥ киһи
төрөөбүт сиригэр
Дьиэ-уот туттан олохсуйар,
Дьиҥ киһи
үөскээбит сиригэр
Көстө кырдьан өр утуйар…
(К., 58 с.)

Билии

Өлүү диэн түүл –
Онно эн уһуктубаккын,
Олох диэн дьүүл –
Омуккун ыҺыктыбаккын…
(К., 300 с.)

Чуумпуруу

Чуумпурабын –
Билээри,
Утуйабын –
Тиллээри.
(К., 193 с.)

Өлүү өлбөт

Өксөкү элиэ –
Өксүөнү тэлиэ,
Өйдөөх тыл биллиэ –
Өлбөт кэм кэлиэ!
(К., 532 с.)

Төннөн кэлиэм

Өлүөм, от үүнүө –
Олоҕум салҕаныа,
Тиллиэм, тиит үүнүө –
Кэриэһим алҕаныа…
(К., 310 с.)

Боотур утума

Тыл, итэҕэл, үгэс –
Олоҥхо үс атаҕа,
Күүс, олоҥхо, бэлэс –
Боотур уус үөс утаҕа!
(К., 225 с.)

Боотурбун

Кырдьаҕаһы ытыктаа –
Ол аата Боотургун!
Олоҕу сылыктаа –
Ол аата Куоһургун!
(К., 231 с.)

Үтүө санаа

Оҕо куйуурдуу турара –
Алаас култуурата!
Ыччат үгэһи туойара –
Сайдыы чиҥ туурата!
(К., 283 с.)

Өй

Таҥараҕа –
Күлүк диэн суох!
Хараҥаҕа –
Хара диэн суох!
(К., 275 с.)

Төрөөбүт дойду

Дьиҥ киһи төрөөбүт сиригэр
Дьиэ-уот туттан олохсуйар,
Дьиҥ киһи үөскээбит сиригэр
Кырдьар уонна өр утуйар…
(К., 58 с.)

Айымньы

Түгэни тутуу, үйэтитии –
Талаан чыпчаала,
Кэрэни булуу, кэрэтитии –
Киһи анала!
Айымньы киһи сүрэҕэр төрүүр –
Дууһанан тахсар,
Айааччы эрэй үөрэҕэр өрүүр –
Кырдьыгын аахсар.
(К., 150 с.)

Таҥара бэлэҕэ

Үөрэхтэр ыккардыларыгар
Далаһаны уурары сатаа,
Сүрэхтэр таптаһыыларыгар
Далаһаны ааһары ааттаа!
(К., 118 с.)

Окко киирии — улуу муударас

Киһи дьүккүөрэ –
Сүппэт,
Олох мөккүөрэ –
Бүппэт…
(К., 326 с.)

Бэлиитик

Эстиэх ыал сүөһүтэ
Бэйэ-бэйэтин кэйсэр,
Кэхтиэх дьон өһүөтэ
Иэстэбилинэн тэйсэр…
(ЭХ, 398 с.)

Биир сүнньү

Киһини буулдьа эрэ өлөрбөт –
Өлөрөр сытыы тыл!
Киһини сэрии эрэ өһөрбөт –
Өһөрөр сыппах сыл!
(ЭХ, 403 с.)

Биир сүнньү

Көлүөнэ ааспыт көлүөнэттэн
Туспа амтаннаах!
Өлүөнэ бээһээ
Өлүөнэттэн
Атын айаннаах!
(ЭХ, 404 с.)

Виталий Власов,
Росссия Суруйааччыларын сойууһун чилиэнэ

Чолбон. – 2016. – №9