Перейти к содержимому
Сүрүн сирэй » Поэзия » «Сээдьэ хайата»

«Сээдьэ хайата»


АНЫ СААС

Аны саас кэлиэҕим,

Өймөкөөммөр төннүөҕүм,

Күүтээр миигин үрүҥ хаарым,

Кылбаа маҥан доҕорум.

Үрүҥ таба буолаҥҥын

Кыыралдьыта эн сиэлээр,

Күлүмүрдэс мойборгунан

Далбаатана эн оонньоор.

Тоҕойдорго тоһуйаар,

Үрэхтэргэ кэтэһээр,

Маҥан хабдьы кэриэтэ

Үрдүбүнэн эн көтөөр.

ЫНЧЫК БУОЛАН ИҤМИТЭ

Хайа хара сирэйигэр

Суоруллубут суорба тааска

Харах уута саккырыыр,

Хайа ытыыр, хараастар.

Хара таастар өйдүүллэр

Күлүк буолбут дьоннору,

Билигин да истэллэр

Дуораан буолбут хаһыыны.

Очуостарга хойгуо тыаһа

Ынчык буолан иҥмитэ,

Үйэлэргэ кистэммитэ

Ыра санаа ымыыта.

Тааска чысхаан чыҥыырар,

Хаары тибэр, ытыйар,

Дьону курдат сүүрэлиир,

Тоҥ сиргэ охтортуур.

Тоҥ тааһы күн ахсын

Көөрөтөллөр, хайыталлар,

Халыҥ хаары хаһаннар

Суол омоонун таһаараллар.

Сылайаллар, охтоллор,

Кыһыҥҥы күн олус кылгас,

Биирдэ эмит саҕахтан

Күн күлүм гынаат, сүтэр.

Барыма даа, Үрүҥ күн,

Сүтүмэ даа, санаа күүһэ,

Хаалларыма эрэл кыымын,

Тыыннаах хаалар түгэни.

Ол да гыннар, Көҥүл күн,

Эргиллээр дуу сарсын эмиэ,

Хас биирдии сардаҥаҕар

Иилэн кэлээр сонуну.

Аҕалаар дуу ыраах дойду

Илгэ-сылаас салгынын,

Сэлиэһинэй суугунун,

Хатыҥ чараҥ ырыатын.

Хайаларга хойгуо тыаһа

Ынчык буолан иҥмитэ,

Үйэлэргэ кистэммитэ

Ыра санаа ымыыта.

Тыһыынчанан тутааччы

Аара суолга хаалбыта,

Сорох ууга тимирбитэ,

Сорох тааска иҥмитэ…

СУЛУСТАР

Мичик-мичик сулустар

Кыламанныын кырыаран,

Бити-бити сипсиһэн,

Мичилиҥнии тураллар.

Күлүм-күлүм сулустар

Күлүмүрдүү күлсэллэр,

Кыраһаны ыһаллар,

Көмүһүнэн сабаллар.

Килбик-килбик сулустар

Сүрэхтэргэ саһаллар,

Ситим-ситим санааны

Үөрэ-көтө саҕаллар.

ТУЛЛУКТАР

Үрүҥ көмүс туллуктар

Үрдүбүнэн көттүлэр,

Күлүмүрдэс кыырпахтар

Күлүм гынан аастылар.

СЭЭДЬЭ ХАЙАТА

Тырымнас сулустар мустаннар

Сээдьэлиир сирдэрэ манна баар,

Тула бары кырыа-кыырпах,

Күлүм-күлүм күлүмүрдэс.

Үргэл сулус – үргүүк таба

Үрдэл хайа үрдүнэн

Чаҕылыҥнас кырыанан

Ыһыахтана ойуолуур.

Очуос хайа чыпчаала –

Удьаа сулус ураһата.

Үйэлэргэ түүн аайы

Кэлэр манна үөрэ-көтө.

Сэргэх сээдьэ үҥкүүтэ

Дьүкээбили үргүттэ,

Сулустары өрүкүттэ,

Халлаан үөһэ өрө көттө.

Аркук, Чолбон, 03.2015